مبروك علينا الحرّية ...مرحباً بك زائراً ومتابعاً ... تواصلك يشرفني

الأحد، يناير 23، 2011

إسأل نفسك ... جاهز؟


تنزل يوم ٢٥، ما تنزلش يوم ٢٥ .. انت حر .. بس قبل ما تاخد قرار مصيري إسأل نفسك .. جاهز؟

كل دعوات النزول بتقول إنه نزول بلا عودة إلا إذا....

عارف إلا إذا إيه؟ وللا نازل وخلاص

فاهم يعني إيه بلا عودة إلا إذا وللا مش فاهم؟

فاهم إن أي نظام هيواجه لحظات تهدد كيانه وسيطرته هيتصرف بحسم وحرفية عالية وللا مش فاهم؟
واخد بالك من وجود قيادات مختلفة بأغراض مختلفة وللا لأ؟
قادر تستوعب إحتمالية الخسارة والمواجهة القوية؟
فعلاً مش لاقي تاكل ومقموع ومقهور ومتعاطف مع غيرك لدرجة المواجهة؟
فعلاً متأثر بنقص الحريات والواسطة والفساد وما إلى ذلك وللا موافق مع الزيطة رغم إنك انت نفسك اتوسطلك ناس في حاجات كتير وانت نفسك دفعت رشوة وانت نفسك ميزت في المعاملة بين الناس؟

فعلاً عندك استعداد لمواجهة قوة تدافع عن بقائها ومعندهاش مانع تضربك أو تحبسك انت واللي يتشددلك مهما كان جنسهم أو سنهم؟ يا ترى هم كمان موافقين يحصلك ويحصلهم كده ولا الكلام ده مش في بالك حالياً؟

وانت بتطالب بالحرية والحق، طالبهم للكل وبالتساوي وللا طالب حاجات للمسلمين وحاجات للمسيحيين وحاجات للستات وحاجات للرجالة؟

واللي حواليك موافقينك يا ترى وللا كل واحد طالب حريات وحقوق بمفهومه الخاص

ضامن كل الناس ديه ما تكسرش وتدمر في طريقها عربيات ومحلات وأرزاق ناس مالهاش دعوة؟

ولو حد عمل كده والأمن استغل الفرصة لمزيد من القمع والتجاوز، يبأه معذور ولا مفتري؟

يا ترى في الفوضى.. عندك وعند غيرك تموين غذائي ودوائي كفاية لحالة الفوضى الآتية لا محاله؟

فاهم إن المؤسسات العسكرية المصرية مش معاك؟

فاهم إن قوات الداخلية فقط = ٢ مليون

فاهم إن البديل حكم عسكري مش مدني وطوارئ أسوأ لفترة غير معلومة؟

فاهم إن عندنا أكتر من مليون مجرم مدان ينتظر الفوضى

متابع نصايح التظاهر اللي في الفيديوهات والكلام المتغطي بتاع إحنا هندافع عن نفسنا وبنحذر !!

عارف مين القادة وللا مسلمها للمجهول؟

متخيل إن مش هيكون مرفوع غير علم مصر وإن الشعارات هتكون وطنية وعامة فقط؟

إذا كان الموضوع كله ينحصر في إن إحنا مش أقل من تونس فياريت تقعد فبيتكو

تاني: تنزل يوم ٢٥، ما تنزلش يوم ٢٥ .. انت حر .. بس قبل ما تاخد قرار مصيري إسأل نفسك .. جاهز؟